Mat 9 | WSK | STEP | Se Jesus aking dal te aragam ale yu luan batogam ale nama ko wonong Capernaum mu te aratam.

Matthew 9

Jesus kari tilital bo nungam

(Mark 2:1-12; Luke 5:17-26)

1 Se Jesus aking dal te aragam ale yu luan batogam ale nama ko wonong Capernaum mu te aratam. 2 Se kari sang kari tilital bo pakapang te giman ilak kote taiman. Se Jesus nunga nongomang ningi nunguning arigam mu nu kari tilital mu maonam, “Aninga kuriang, ni gemang sokel ago bagerko. Ani nika memek siwu warem,” mam.

3 Mu te Law Den ko kausa kari sang nunumi manarukasan, “Kari imi Kaem kiaso ale den owore balso pa!” makasan.

4 Bare Jesus nononga ikia mu ko ikiam, ale nunga maonam, “Nina awuk se nengemang ningi ikia memek sowore aniso ya?” mam. 5 “Mel awuk bore ko betera ikup biya? Ani balik ‘ani ka memek siwurem’ maik, agi ani balik ‘bares am aolak ilupko’ maik, mu am balikko. 6 Bare Kari ko Kuriang ali imi te memek siwurokko sokel nukote terong mam se nina te ikialko ....” umu te Jesus kari tilital mu maonam, “Ni bares, ka pakapang gi ale karogo ka wonong te namarko,” mam.

7 Se kari mu barasam ale ko uningi namaram. 8 Se kariimet mel mu aringiman ale nguangaman ale Kaem ko nup patawukasan. Mu awuk, Kaem ali imi te ko kari sokel biyala uwutata nungaram se ari gilingiman.

Jesus manga takis tata kari Matthew auram

(Mark 2:13-17; Luke 5:27-32)

9 Se Jesus aking aolak iluwam namawa se takis tata kari bo, ko nup Matthew, mu ko ura kuwim te dagiwaram se arigam, ale maonam, “Ni ani agowom karoko,” mam. Se Matthew barasam ilak namakaso.

10 Udagi te Jesus Matthew ko kawam ningi na nowaram se takis tata kari alo, se memek betera ko kari alo, mu suen biya taiman ale nu se ko olekem alo arungu na yu nokasan. 11 Se Pharisee kari sang munan mu aringiman ale ko olekem alo nunga isarman, “Nenenga kari biya nu awuk se takis tata kari se memek betera ko kari alo wore arungak na naso ya?”

12 Se Jesus nononga den mu ikiam ale ko iwita balam, “Doctor mu kariimet kuera ikes mena mu nogo ko ura me beteso. Mena. Nu kariimet kuera ikes karogo mu nunga ura beteso. 13 Umutang ko nina namaral ale Kaem ko batoga ewere ko ikia tal ale ko duap ko ninguru ikialko. Kaem iwita balam, ‘Ani bulmakau-sipsip nunga mora ale te tama betera ko munan mu ko me kuesam,’ mam. ‘Ani ninimi ko kuera ko munan mu asele ko kuesam,’ mam. Den umutang ko duap ko ninguru ikial ale te beteralko. Ani kariimet diram mu nunga giekko me tairem. Mena. Ani kariimet memek te dagulaman ale bagasan wore nunga giekko tairem.” ^{▼▼Mat 9:13 Hosea 6:6.}

John ko olekem na kaola ko munan ko Jesus isarman

(Mark 2:18-22; Luke 5:33-39)

14 Se udagi te Anuwa Kari John ko olekem saki Jesus kote taiman ale isarman, “Ana se Pharisee alo tom saki na ko nagiring kalosan. Bare awuk se nika olekem alo na ko nuguring me kalosan?”

15 Se Jesus den koma iwita nunga maonam, “Kari bo nu iru imet tata se nu ko sikisaki arungak bagoso, mu tom mu te noko sikisaki nongomang bataga se bagomon i? Mena. Bare ko tom tai aratuk se kari saki nu tamon ilak namomon, se tom mu te asele ko sikisaki nongomang bataguk se na namonko nuguring kalomonko. ^{▼▼Mat 9:15 Butata Jesus ko olekem arungu bagakaso se nuna ko amilmil bitakasan ale na namonko nuguring me kalokasan, am no gilingikaso.}

16 “Kari bo guang iru ko bilik bo taso ale ko guang bo gigira barakam umu te me biriso. Nu uwuta bitiruk, mu guang bilik iru mu numi tagi tauk peleruk, se guang gigira mu akingtala barukuk mutim biyala bitirukko. ^{▼▼Mat 9:16 Jesus munan iru ago tairam mu munan giringila ko mu ago me biguwuram. Munan iru: John 1:17; Rom 10:4; 2 Cor 3:6.} 17 Aking kari bo waen iru taso ale belelek guang gigira mu ningi me langiso. Nu uwuta bitiruk, mu waen iru mu laga kapuruk se belelek guang barakuk se waen aliti kapurukko. Bare mena. Nu waen iru taso ale belelek guang iru, kumik galuguluk, mu ningi langiso, se mel ilagala la am yawarakala anisan.”

Jesus imet bo noko guang iluwam mu saongam, ale aking Jairus ko nanawus mumam se barasam

(Mark 5:22-43; Luke 8:41-56)

18 Jesus den mu baluwaram se kari supuling bo tairam ale koma dugu te bugura kulukuam ale balam, “Aninga nanawus am aitakta diram kueram. Bare ni tair ka kiting kumik te bitar se aking barasukko,” mam. 19 Se Jesus barasam ale ilak namaram, se ko olekem ilak tala namaman.

20 Se imet bo, nu yar 12 ningi gue la sapa lagakaso, mu nu Jesus buring ko tairam ale ko guang kinikan ilu tam. 21 Ale nu gomang ningi la balam, “Ani noko guang imi la ilu taik mu ani nungerikkowo.”

22 Se Jesus punga geragam arigam ale balam, “Imet,” mam, “ka gemang sokel karogo anirukko! Nika gemang ningi nunguning ka nungam,” mam. Se tairatela imet mu nungeram.

23 Se Jesus kari supuling mu ko kawam ningi kasu naguram. Ale sige duap ituguma ko kari, se kariimet mo nia se nirung biya bitawaman umu nungarkam, 24 ale nunga maonam, “Nina suen la ningi imi te bagasan mu aratalko! Kuriang itiwik gotek mu me kueram, am aniwoso,” mam. Se kariimet den mu ikiman ale Jesus gusirukasan. 25 Bare nuna suen la matangi arataman mu te nu kasu naguram ale kuriang itiwik gotek mu ko kuting iluwam se nu barasu daigam. 26 Se mel nu beteram mu ko den pagam ale sor umutang suen la te geraga saparam.

Jesus kari ilagala nomotam mena wore nunga nungam

27 Jesus sor umu beteram ale aolak iluwam namawaram se kari ilagala nomotam mena mu kowom karoman ale nu iwita arukasan, “David ko Kuriang, ni gemang ana nangaruko!” makasan. 28 Se nu kawam ningi kasu naguram mu kari ilagala umutang nukote taiman. Se nu nunga isuam, “Ani nina ilagala ninga nungekko terong maem mu ko nina nengemang ningi nunguning e?”

Se nuna balman, “Kari Biya, ana nangamang ningi nunguning,” maman.

29 Se nu nunga nomotam iluwam ale balam, “Ninga nengemang ningi nunguning te butata aratu ningarukko.” 30 Umutang mu nuna nomotam pauk palagam se loagakasan. Se Jesus den sail ago nunga maonam, “Ninguru sinar talko! Kilek imitang ko kari bo me maonalko,” mam. 31 Bare nuna arataman namaman ale Jesus ko dugu duap sor umu lilim la ningi am balu balu ago nama sapaman.

Jesus kari bo kuring sisira mu nungam

32 Se nuna ilagala namangaman se kariimet saki kari bo bur memek kumik ningi anira se ko kuring sisira mu diruwuman ilak Jesus kote taiman. 33 Se Jesus bur memek mu kaoram se kari mu munak duap beteram munakakaso. Se kariimet ari gilingiman ale biririkiman, ale balukasan, “Girakala kilek bo iwita Israel sor ningi aratam se ana me aringiman!” makasan. 34 Bare Pharisee alo balman, “Mu bur memek nunga supuling nu sail tuso se te bur memek nunga karoso,” makasan.

Jesus kariimet nunga noman batagam

35 Se Jesus wonong biya ta, gotek ta, suen la te geraga saparam. Ale synagogue ningi kariimet Kaem den nunga manaru se, kingdom ko den gilalong yawara balukaso, ale kariimet kuera duap duap karogo mu nunga nungurukaso. 36 Kariimet suen biya nunguningkiri, se nu nungarkikaso ale nogo ko noman ninguru batagakaso. Mu awuk, nuna sipsip nungumik bitua kari bo mena, am nongota ikup kua kua bagakasan iwita nungarkam.

37 Umutang ko nu ko olekem nunga maonam, “Na inang suen biya ningam te yopaman ale anisan, bare ko ura kariimet gi bolala awumonko wore suen biya mena. 38 Se nina Ningam ko Kotam aru maonal, se nu ko ura kariimet sang nunga awurok se taimon ale na inang gi bolala awumonko.”